“IRIM” Судалгааны хүрээлэн нь энэ удаа нийгмийн халамжаас олгогдож байгаа мөнгөн тэтгэмж, ялангуяа “Хүүхдийн мөнгө”  хөтөлбөрт өөрчлөгдсөнөөр эмзэг бүлгийн өрхүүдэд үүсэх нийгэм, эдийн засгийн шууд нөлөөг үнэлэх судалгааг Нэгдсэн Үндэстний Байгууллагын Хүүхдийн Сантай хамтран хэрэгжүүлж эхэллээ. “Хүүхдийн мөнгө” хөтөлбөр нь 2005 оны 1 сараас өнөөг хүртэл манай улсын нийт хүүхдийг хамруулж байсан боловч Олон Улсын Валютын Сантай хийсэн тусламжийн гэрээний дагуу уг хөтөлбөрт өөрчлөлт орж Mонгол улсын нэн ядуу буюу нийт өрхийн 40%-д хүүхдийн мөнгө олгогдохоор болоод байгаа билээ.

Энэ өөрчлөлтийн үр дүнг тодорхойлохын тулд Баянхонгор аймгийн Гурванбулаг, Эрдэнэцогт сумд, Баянзүрх, Сонгинохайрхан дүүргийн 2 хороонд тус бүр 35 өрх, 10 хүүхдийг хамруулан нэг жилийн хугацаатай сар бүр давтан судалгаа явуулсны үндсэн дээр өөрчлөлт, үр нөлөөг үнэлэх юм.